Poslovne vijesti - Makedonija

Ги пикираат македонските слободни зони

Стопанственици од турскиот град Бурса се заинтересирани за инвестирање во Македонија и за поволностите на слободните економски зони.

Околу 25-мина во саботата беа во Македонија, само две недели откога во нивниот град работно престојуваше министерот за економија Ваљон Сараќини. Тој ја очекува првата нивна инвестиција во април.

- Најмногу внимание им привлекоа слободните економски зони. За жал, немале доволно информации, не ги знаеле нашите фискални бенефиции и другите поволности кои ги нудиме во зоните - изјави Сараќини.

Сопственици на текстилни компании се заинтересирани да го прошират својот бизнис во Македонија, како и сопственици на фабрики кои произведуваат автоделови наменети за извоз и кои би сакале тоа да го направат и овде.

- Се надеваме дека нашето стекнато искуство и потенцијалот кој го имаме во Турција, со конкретни инвестиции, ќе ги пренесеме и овде, во Македонија. Има одлична клима за инвестиции и уверени сме дека претставници од различни сектори кои се во делегацијата ќе имаат можност за инвестирање зашто се нудат одлични можности и сосема солидна и евтина работна сила. Сакаме да ги реализираме и сите други видови на соработка во различни сфери со оваа прекрасна земја - додаде Крџе.